Demonstraziuns paschaivlas a Boston

En la metropola da la costa orientala dals Stadis Unids han radund 40'000 persunas demonstrà cunter odi e rassissem.

Millis da demonstrants en citad americana.

Legenda da maletgs: La demonstraziun a Boston è stada paschaivla. Reuters

Il medem temp han numerusas autras persunas demonstrà en in parc da la citad per la libertad da l'opiniun. Quai rapportan las medias localas. Pliras persunas cun relaziuns tar extremists da la dretga avevan annunzià da sa participar a lezza demonstraziun. Var 500 policists han controllà las duas demonstraziuns. Radund 20 persunas sajan vegnidas arrestadas.

Las demonstraziuns han gì lieu in'emna suenter ils cravals en la citad da Charlottesville. Là era ina dunna morta suenter ch'in extremist da la dretga supponì era charrà cun ses auto en in'acziun da protesta.

Laud da Donald Trump

Il president dals Stadis Unids ha ludà ils demonstrants per lur curaschi. Ultra da quai ha Donald Trump er ludà la lavur da la polizia da Boston. En connex cun ils cravals a Charlottesville era Trump vegnì crititgà da tuttas varts perquai ch'el n'era betg sa distanzià cleramain da la violenza dad extremists dretgs.

RR novitads 06:00