Siglir tar il cuntegn
cuntegn

Exteriur Demonstraziuns a Barcelona

A Barcelona èn il venderdi saira millis persunas idas sin via per demonstrar cunter ils cumond d'arrest d'impurtants aderents da l'independenza da la Catalugna.

Demonstrants.
Legenda: Ils cumonds d'arrest han motivà millis persunas d'ir sin via. Keystone

La polizia è intervegnida strict cunter las millis persunas ch'han il venderdi saira demonstrà a Barcelona. Sco che las agenturas da novitads rapportan, èn almain 24 demonstrants vegnids blessads.

Motiv per la inquietezza en la citad principala da la Spagna èn stads cumonds d'arrest cunter 13 separatists catalans. Tranter ils accusads èn era l'anteriur president catalan Carles Puigdemont e Jordi Turull che candidescha sco president regiunal. Accusads vegnan els pervia da rebelliun – in delict che po muntar 30 onns arrest.

Cumonds d'arrest internaziunals

Per la secretaria generala da la partida separatista Marta Rovira han ins perfin relaschà in cumond d'arrest internaziunal suenter ch'ella aveva ignorà l'invitaziun da la dretgira ed era fugida en l'exteriur. Tenor las medias haja ella tschertgà asil en Svizra.

Er per Carles Puigdemont e quatter ulteriurs separatists han ins extendì il cumond d'arrest sin plaun internaziunala.

RR novitads 07:00