Siglir tar il cuntegn

Header

cuntegn

Exteriur Demonstraziun cunter Donald Trump – ed entamez in Rumantsch

Sin l’entir mund è vegni demonstrà la sonda passada cunter il nov president dals Stadis Unids Donald Trump. Sulettamain en la chapitala americana Washington èn fin 500’000 persunas stadas sin via. Tranter auter era Claudius Vincenz.

Las protestas organisadas dad activistas per il dretg da las dunnas sa drizzan cunter l'antifeminissem, violenza, rassissem, omofobia ed intoleranza religiusa. Per l’occurrenza a Washington èn s’annunziadas er diversas persunalitads prominentas – uschia las acturas Ashley Judd e Scarlett Johansson, il reschissur Michael Moore u la defensura dal dretg civil Angela Davis…

audio
Bunura: Demonstraziun cunter Trump a Washington
ord Actualitad dals 23.01.2017.
laschar ir. Durada: 2 minutas 52 Secundas.
La demonstraziun cunter Donald Trump è stada fitg paschaivla.
Autur: Claudius Vincenz

…ed il Rumantsch Claudius Vincenz

Claudius Vincenz è sgulà da Detroit a Washington per demonstar encunter Donald Trump.
Legenda: Claudius Vincenz è sgulà da Detroit a Washington per demonstrar cunter Donald Trump. MAD

I saja stà ina demonstraziun fitg paschaivla, di l’um ch’è extra sgulà da Detroit a Washington per demonstrar cunter il nov president american. Agitaziun e hectica durant la demonstraziun devi mo sch'in uffant perdeva ses geniturs, di Claudius Vincenz (58).

L’um ch'è oriund d’Andiast ha, sco blers auters, demonstrà cun in agen placat. Sin quel steva tranter auter: «NA a la corrupziun» ni er «NA manzegnas». El haja sentì blera energia durant il marsch ed el speria ch’i haja era purtà insatge.

audio
Saira: Washington: Co vinavant suenter demo cunter Trump
ord Actualitad dals 23.01.2017.
laschar ir. Durada: 1 minuta 23 Secundas.

Co vinavant?

Fin uss haja anc dà naginas midadas, manegia Claudiu Vincenz ironicamain. Ma el fetschia tuttina quitads, co i giaja uss vinavant. Qua tanscha in sguard sin il cabinet dal nov president: Quasi tut ils posts èn occupads da persunas fitg conservativas.

Gia cura che Trump è vegnì elegì il november sco nov president regiva tar Vincenz ina tscherta tema. Ina tema che na saja betg svanida. El spera che l'èra Donald Trump giaja uschè spert sco pussaivel afin.

RR actualitad 06:00

Artitgels legids il pli savens