Siglir tar il cuntegn

Exteriur Demonstrants naziunalistics assaglian parlament macedon

En la chapitala Skopje ha aderents da l'anteriur schef da regenza conservativ Nikola Gruveski attatgà il parlament. Quai cun l'intenziun d'impedir la furmaziun d'ina nova regenza. 10 persunas sajan vegnidas blessadas, tranter auter era il schef da regenza futur, il socialdemocrat Zoran Zaev.

Purtret dals demonstrants davant ina parait da policists.
Legenda: La crisa en la Macedonia cuzza gia dapi il 2015. Keystone

Da l'attatga sin il parlament macedon a Skopje sajan 10 persunas vegnidas blessadas. Radund 100 demonstrants mascrads sajan entrads la gievgia saira en il parlament. Els hajan fatg sgulatschar bandieras macedonas e chantà la himna naziunala. Il minister da l'exteriur discurria ternor rapports da medias da 10 parlamentaris sco era in policist e plirs schurnalists che sajan blessads.

Ils demonstrants protesteschan cunter il plan dal socialdemocrat Zaev, da sa laschar eleger sco schef da regenza cun agid d'ina partida minorena albana. Els vesan en quai in privel per l'unitad e la suveranitad da la Macedonia.

La partida conservativa ch’era fin uss a la pussanza discurra dad in putsch. Ella aveva pers las elecziuns parlamentaras il december, ma refusescha da desister da la pussanza.

RR novitads 06:00