Siglir tar il cuntegn

Header

Navigaziun

Schuldads armads.
Legenda: Islamists han deliberà blers praschuniers ord ina praschun en il sid da las Filippinas. Keystone
cuntegn

Exteriur Deliberà passa 150 praschuniers sin las Filippinas

Islamists probabels han assaglì ina praschun e deliberà blers praschuniers. In guardian è mort da l'acziun.

Dad ina praschun en la provinza da Cotabato èn passa 150 praschuniers ruts ora. Quai suenter che rebels muslims avevan assaglì la praschun en il sid dal stadi insular asiatic. Quai rapportan las autoritads filippinas.

Dals attatgaders sa tractia probabel da rebels muslims d'ina gruppa radicala da la «Front da liberaziun islamica Moro» (Milf). Els hajan cunzunt gì en mira cellas da praschun cun rebels probabels. I sa tracta da la pli gronda fugia or d’ina praschun sin las Filippinas dals davos onns. Tenor il directur da la praschun è ’in guardian vegnì mazzà durant il sajettim che haja cuzzà duas uras.

Praschuniers anc en fugia

L'armada, la polizia e las autoritads localas tschertgan ils praschuniers ch'èn en fugia. Almain quatter sajan puspè vegnids arrestads, uschia il directur da la praschun en la citad da Kidawapan.

Las Filippinas èn per gronda part catolicas. Dapi decennis vegnan ellas adina puspè attatgadas da gruppas da rebels muslims. Suenter tractativas da 17 onns avevan la regenza ed ils rebels fatg pasch il mars 2014.

RR novitads 06:00