Siglir tar il cuntegn
Inhalt

Exteriur Decleraziun finala G20 – Cunvegna da clima senza USA e Tirchia

Ils Stadis Unids restan tar lur opiniun – els bandunan la cunvegna da clima da Paris. A Hamburg èn ils pajais dal G20 sa cunvegnids davart ina decleraziun finala, quai tenor diplomats. Ma curt suenter ha la Tirchia declerà da ponderar da ratifitgar la cunvegna da clima.

Wkadimir Putin, Angela Merkel e Recep Tayyip Erdogan da sanester.
Legenda: Qua era tut anc en urden, curt suenter ha Recep Tayyip Erdogan ditg da ponderar la cunvegna da clima. Keystone

Tirchia na vul uss tuttina betg

Il president tirc Recep Tayyip Erdogan ha smanatschà da betg ratifitgar la cunvegna da clima da Paris. En la decleraziun finala era la Tirchia anc sa mussada pronta da ratifitgar la cunvegna. Il motiv è che la Tirchia na vul betg vegnir classifitgada sco stadi industrial. Ils stadis industrials ston pajar daners en in fond d’ambient – enstagl da survegnir daners ord in tal fond. Tenor Erdogan ha l’anteriur president franzos François Hollonde empermess che la Tirchia na vegnia betg numnada sco pajais industrial.

Cunvegna da clima senza ils Stadis Unids

La decleraziun finala dals G20 cuntegna ina posiziun cuminaivla areguard dumondas da commerzi e la protecziun dal clima. Ils Stadis Unids restan tar lur opiniun. Els bandunan la cunvegna da clima da Paris. L’emprim ristgava l’inscunter dals G20 anc da far naufragi. Quai pervi da las posiziuns dal president american Donald Trump areguard la politica da commerzi e da clima.

L'Ucraina na chatta nagin pauss, quai duai midar

A l’ur da l’inscunter dals G20 è era la crisa en l’Ucraina da l’Ost stà in tema, quai tar in inscunter a trais. La Germania, la Russia e la Frantscha sajan da l’avis che pass concrets sajan necessaris per realisar finalmain la cunvegna da Minsk, ha ditg in pledader da la regenza tudestga suenter l’inscunter da la chanceliera tudestga Angela Merkel cun il president russ Wladimir Putin ed il president franzos Emmanuel Macron. Malgrà la cunvegna dal 2015 datti adina puspè cumbats tranter separatists pro-russ e l’armada ucranaisa.

Fond per promover las dunnas

La banca mundiala ha stgaffì in fond per promover las dunnas en l'economia.
A l'ur da l'inscunter dals G20 a Hamburg ha l'organisaziun communitgà che fin ussa sajan 325 milliuns dollars vegnids rimnads. Il president da la banca mundiala, Jim Yong Kim ha ditg ch'el speria ch'i dettia anc dapli daners da stadis e persunas privatas. La finamira saja da stgaffir in fond che cumpiglia milliuns.

Dal fond da la banca mundiala duain pudair profitar interprendidras en pajais en svilup. Per ellas duai tranter auter daventar pli simpel da prender si credits.

Situaziun cun demonstrants è sa calmada

En il decurs da la notg è la situaziun sa calmada suenter ch'ils grevs cravals avevan cuntinuà venderi saira. La notg è ina gronda rotscha da policists sa messa cunter var 1'500 randa-laders – ch'an sblundergià butias ed attatgà policists en il Schanzenviertel.

Tar ils cravals èn var 200 policists vegnids blessads. Fin uss èn var 100 persunas en arrest. La chanceliera tudestga Angela Merkel a condemnà la violenza ed exprimì ses sustegn per la polizia.

Armistizi per il sid-vest da la Siria

Ils dus presidents Trump e Putin èn sa cunvegnids tar lur discurs a l’ur da l’inscunter dals G20 ad in armistizi per il sidvest da la Siria. La Jordania sa participeschia er a l'armistizi. L'armistizi cumenza la dumengia, uschia il minister da l'exteriur american Rex Tillerson suenter l'inscunter.

Putin e Trump dattan il maun.
Legenda: Putin e Trump dattan il maun – tgi che ha tegnì pli ditg il maun da l'auter n'è anc betg vegnì communitgà da las agenturas. Keystone

Il discurs tranter ils dus presidents Donald Trump e Wladimir Putin haja durà marcantamain pli ditg che planisà, rapportan agenturas da novitads russas. Wladimir Putin haja ditg tenor l’agentura russa Tass: «Jau hai gì ina conversaziun fitg lunga cun il president dals Stadis Unids: Nus avain discutà da bleras dumondas, l’Ucraina, la Siria ed intginas dumondas bilateralas».

Inscunter tranter Trump e Putin vegn er observà cun disfidanza

Il cumportament da Donald Trump envers la Russia vegn observà da parts da la publicitad americana cun gronda disfidanza. Basa per la disfidanza è l’affera enturn probablas attatgas da hackers russ a favur da Trump durant ses cumbat per il presidi american. Lultim temp aveva Trump sa servì dentant dad in tun pli giz envers la Russia, uschia er tar sia visita en Pologna la gievgia.

Wladimir Putin è per il commerzi liber

Tant il president russ Wladimir Putin sco er il president da la cumissiun da l’UE Jean-Claude Juncker èn s’exprimids en favur dad in commerzi mundial avert. Els han crititgà tras quai indirectamain il president american Donald Trump – ch’è cunter il commerzi liber.

Els tus en posiziun da fotografia.
Legenda: L'uschenumnada «fotografia da famiglia» da las partecipantas ed ils partecipants pli impurtants a l'inscunter dals G20. Keystone

Inscunter suprem ha cumenzà il venderdi

La chanceliera tudestga Angela Merkel ha beneventà ils schefs da stadi e da regenza il venderdi avantmezdi a l’emprim inscunter dals G20 en Germania. L’emprim han ils politichers discutà davart il cumbat cunter il terrorissem internaziunal. Il suentermezdi èsì lura ì per ils temas creschientscha e commerzi liber.

In ulteriur punct sin la glista da tractandas è l’emprim inscunter persunal tranter il president american Donald Trump ed il president russ Wladimir Putin.

Demonstraziuns e cravals

La polizia haja mobilisà policists dad auters Bundesländer, communitgescha la regenza da Hamburg. Uschia hajan attatgà en il quartier Altona il venderdi la bun’ura var 60 mascrads la polizia. La polizia rapportescha dad autos ch’èn vegnids dads fieu.

policists e demonstrants amez aua e discordia.
Legenda: Hamburg, il venderdi avantmezdi – conflicts tranter policists e demonstrants. Keystone

Era tschertas manifestaziuns èn per part pertutgadas dals cravals. Il minister da finanzas tudestg Wolfgang Schäuble e la first lady americana Melania Trump n'han betg pudì ir a lur termins.

Cunzunt policists blessads

La polizia sa mussa stupefatga dal livel da violenza, che vegnia duvrà da la part agressiva dals demonstrants. Enfin uss sajan vegnids blessads passa 200 policists. Dapi il cumenzament da sia lavur a l'inscunter suprem haja la polizia arrestà var 100 persunas. Quai scriva la polizia sezza. Cifras da passants u demonstrants blessads na dettia actualmain anc naginas. I haja dà numerus donns vi da fatschentas, autos e vid in bajetg d'ina dretgira.

La gievgia avevan demonstrà en tut radund 12’000 persunas a Hamburg cunter l'inscunter dals G20.

Scumond da sa radunar fin la sonda saira

L'inscunter dals G20 a Hamburg dura da venderdi enfin sonda saira. Dapi il venderdi la damaun a las 06:00 enfin sonda a las 17:00 vala en parts dal center da la citad in scumond da sa radunar. Per garantir la segirezza dals participants èn vegnids clamads 19’000 policists. I sa tracta da l’emprim inscunter G20 en Germania.

RR novitads 06:00++