A partir dad oz avra l'Austria ils cunfins cun 7 da ses 8 pajais vischins – cun la Svizra, la Germania, il Principadi dal Liechtenstein, la Slovachia, la Slovenia, la Tschechia e l'Ungaria. Quai ha annunzià il minister da l'exteriur austriac Alexander Schallenberg.
Cunfin cun l'Italia anc betg avert
Sulettamain il cunfin cun l'Italia resta per entant serrà. La Svizra da sia vart vegn ad avrir ses cunfins cun l'Austria, la Germania e la Frantscha sco planisà e sa cusseglià cun las autoritads da quels pajais ils 15 da zercladur. Perquai para er il Cussegl federal dad esser surstà da l'annunzia da la regenza a Vienna.
Economia fa squitsch
Questa avertura anticipada mussa surtut duas chaussas: Primo: ils pajais da l'Europa Centrala han sut controlla il coronavirus. Secundo: Quant bler squitsch che l'economia, surtut la branscha da turissem, fa per tuttina anc salvar questa stagiun.
