Siglir tar il cuntegn

Exteriur Da libra voluntad - concerns tudestgs cloman enavos 630’000 autos

Ils fabricants dad Audi, Porsche, Mercedes, VW ed Opel vegnan a clomar enavos da lur autos pervi dad in midament en l'installaziun per nettegiar las svapurs - uschia citeschan differentas agenturas da novitads in representant da la regenza tudestga.

Ina lingiada dad autos en in stau.
Legenda: Ils disgusts na paran betg da prender fin - 630'000 autos tudestgs stoppain turnar en lur concerns pervi dad in'adattaziun tecnica necessaria. Keystone

Suenter ina seria da tests da l'uffizi federal dad autos han ils fabricants dad autos para sa decis or da libra voluntad, da clomar enavos 630'000 autos. Ils fabricants vulan adattar in mecanissem che reducescha il process da nettegiar svapurs tar tschertas temperaturas.

Precauziun preventiva en Germania

L’uffizi aveva fatg sin incumbensa dal minister da traffic tudestg Alexander Dobrindt (CSU) ina seria da tests da remesiraziuns tar las svapurs. Ni hajan els chattà autos cun ina software illegala, ni scumandassi la lescha da l’UE dad installar quest mecanissem da nettegiar svapurs.

En la cumissiun dad examinaziun dettia dentant dubis, schebain l’installaziun saja propi necessaria per proteger ils elements da construcziun. Perquai sajan vegnids dumandats ils fabricants, dad adattar il mecanissem.

Daimler aveva gia communitgà, ch’en lur autos vegnia reducì il process da nettegiar las svapurs per proteger il motor, sch’igl è pli fraid che 10 grads.

RR novitads 14:00