Siglir tar il cuntegn

Exteriur Cussegl da segirezza da l’ONU unanimamain cunter Stadi Islamic

Il Cussegl da segirtad da la Naziuns Unidas ha appellà a tut ils commembers d’agir communablamain cunter la milissa da terror Stadi Islamic (SI). La resoluziun correspundenta inoltrada da la Frantscha ha il cussegl approvà unanimamain.

La Frantscha – cun il portaviuns Charles de Gaulle – duai vegnir sustegnida en il cumbat cunter il SI.
Legenda: La Frantscha – cun il portaviuns Charles de Gaulle – duai vegnir sustegnida en il cumbat cunter il SI. SRF

Tenor la resoluziun duain tut ils pajas coordinar e rinforzar las mesiras per impedir attatgas da terror dal Stadi Islamic. Quai en cunvegnientscha cun il dretg internaziunal e cun ils dretgs umans. Il cussegl ha numnà il SI in “privel global senza exempel per la pasch e per la segirezza internaziunala”.

Resoluziuns dal Cussegl da segirtad da l’ONU en tenor dretg internaziunal liantas per ils commembers. La votaziun è stada gist in’emna suenter las attatgas da terror da Paris.

Nagin dretg per acziuns militaras

La resoluziun na dat però nagin dretg per acziuns militaras cunter il SI. Era l’artitgel 7 da la charta da l’ONU na vegn betg numnà; quel dat a stadis la pussaivladad da duvrar violenza. Entant porscha la resoluziun in sustegn politic en il cumbat cunter la gruppa dschihadista.

Ultra da las attatgas a Paris condemna la resoluziun era las attatgas a Sousse (Tunesia), Ankara e Beirut sco era l’attentat sin in aviun russ sur il Sinai.

RR novitads 06:00