Cussegl d’Europa crititgescha co ils fugitivs vegnan tractads

Il cumissari per dretgs umans dal Cussegl d'Europa Nils Muiznieks dat nauschas notas a la politica da fugitivs da l'Europa. Enstagl da gidar ils fugitivs, concurrenzeschian ils pajais europeics in l'auter, tgi che vegnia da starmentar ils migrants il pli fitg.

Il cumissari per dretgs umans dal Cussegl d'Europa Nils Muiznieks è oriund da la Lettonia.

Legenda da maletgs: Il cumissari per dretgs umans dal Cussegl d'Europa Nils Muiznieks è oriund da la Lettonia. Keystone

Nils Muiznieks ha discurrì d'in circul vizius. Quest agir violeschia ils standards da dretgs umans e da la solidaritad internaziunala. Blers pajais realiseschian mesiras cuntraproductivas u pondereschian talas, ha ditg il cumissari.

La critica en detagl

Sco exempel ha Muiznieks menziunà las saivs che vegnan construidas, il sustegn finanzial che vegn scursanì, l’atgna proprietad che vegn confiscada e ch’i vegn restrenschì da laschar vegnir suenter commembers da famiglia.

Ils cussegls dal cumissari

Il cumissari per dretgs umans dal Cussegl d’Europa Muiznieks appellescha a tuts pajais europeics, da sa stentar dapli per schliaziuns politicas dals conflicts en la Siria, en l’Irac ed en l’Afghanistan. Ultra da quai giavischa el d’amplifitgar la repartiziun da fugitivs decidida or da la Grezia ed or da l’Italia.

RR Novitads 14:00