Siglir tar il cuntegn

Exteriur Cunvegna da basa pudess esser sut tetg pli svelt che pensà

Las contractivas davart dumondas tecnicas sajan quasi schliadas, ina cunvegna pudess vegnir suttascritta gia la stad, uschia il cusseglier federal, Ignazio Cassis. Ma ussa suondia la fasa politica, nua che quai dettia anc intginas differenzas.

Purtret Ignazio Cassis
Legenda: Ignazio Cassis è da l'avis ch'i pudess ir pli svelt che pensà cun la cunvegna da basa. Keystone

Il parlament vegnia er a sa fatschentar cun la chaussa. «La finala decida il pievel.» Anc sajan ins vid contractar. Ma questa part possia vegnir finida pli svelt che pensà, ha ditg Cassis durant l'avertura da la messa Muba a Basilea. Ina dretgira da cumpromiss pudess purtar vinavant considerablamain las contractivas.

Urari fitg stretg

Anc avant in mais ha Cassis ditg, avant milli represchentants da l'economia en Svizra franzosa che la cunvegna da basa stoppia vegnir reglada anc quest onn. Uschiglio vegnia la cunvegna da basa spustada enfin almain il 2021, ha el avertì.

Proxim onn dettia elecziuns en Svizra e sin il palc european. Suenter creschia la tensiun cunter il 2020, pervi dal Brexit. «In tissi per la Svizra», ha ditg Cassis. La cunvegna da basa saja be ina dumonda dal proceder. I na vegnia fatg nagut che na saja betg en l'interess da la Svizra. La Svizra na surpiglia plinavant betg automaticamain il dretg european, ha ditg il minister da l'exteriur. Quai stoppian ins accentuar fermamain.

Medemas cundiziuns

L'entschatta mars ha era Brüssel renconuschì a moda positiva la strategia svizra envers l'Uniun Europeica. «Nus vesain ina ferma veglia da lavurar vid ils puncts anc averts», hai gì num là en ina posiziun. Qua numna la cumissiun da l'UE explicitamain la rolla dal tribunal da la Communitad europeica (EuGH) en cas da dispita ed il subsidi dal stadi public. Quests puncts stoppian vegnir reglads, «per garantir medemas cundiziuns per nossas interpresas.»

«Finamira è e resta da terminar las lavurs enfin la fin dal 2018.» La cumissiun da l'UE admonescha dentant, «ch'i na possia betg vegnir «piclà ivettas»».

Steinmeier appellescha a meglras relaziuns

Avant la visita dal president da la Germania, Frank-Walter Steinmeier en Svizra ha el appellà per meglras relaziuns da la Svizra cun l’Uniun europeica. Da la svizra giavischass Steinmeier ch’ella na vesia l’UE betg sco in inimi, ha el ditg a radio SRF. El speria che las contractivas per ina cunvegna da basa fetschia prest progress, uschia Steinmeier vinavant.

Cun la cunvegna da basa ch'è vegnida numnada dal president da la cumissiun da l'UE Jean-Claude Juncker sco contract d'amicizia duajan plirs contracts bilateralas vegnir decis sut in tetg.

RR novitads 06:00