Siglir tar il cuntegn

Exteriur Cunvegna cunter taglia dubla cun Arabia Saudita

Suenter lungas tractativas è la cunvegna davart l'imposiziun dubla da taglias da la Svizra cun l'Arabia Saudita sut tetg. Il schef da finanzas Ueli Maurer ha suttascrit la cunvegna a Riad.

panorama da la capitala saudita Riad
Legenda: En la capitala saudita Riad ha cusseglier federal Ueli Maurer suttascrit la cunvegna davart l'imposiziun da taglia dubla. Reuters

Il december 2010 avevan las tractativas davart la cunvegna cun l'Arabia Saudita cumenzà. Lura èn suandadas lungas tractativas davart l'imposiziun dubla da taglias tar las taglias sin las entradas e sin la facultad, ha confermà il departament federal da finanzas.

Collavuraziun regulara pli stretga tar finanzas

Il medem mument haja cusseglier federal Ueli Maurer era discutà cun ses collega d'uffizi saudiarab Mohammed Al-Jadaan d'approfundar la cooperaziun en il sectur da finanzas insumma. Quai cun installar in dialog finanzial regular.

Barat automatic d'infurmaziuns

Il december aveva il parlament svizzer approvà il barat automatic d'infurmaziuns davart contos da finanzas cun l'Arabia Saudita ed ils Emirats Arabs Unids.

RR novitads 11:00