Siglir tar il cuntegn

Header

Navigaziun

cuntegn

Exteriur Cumissiun da l'UE propona libertad da visum per Tirchia

Tircs duain en l’avegnir pudair vegnir senz’in visum en il spazi da Schengen. La cumissiun da l’UE vul abolir l’obligaziun da visum. Uschia ademplescha ella ina pretaisa centrala da la Tirchia en la cunvegna da fugitivs. Anc nagina posiziun datti dals stadis e dal parlament da l'UE.

La cumissiun da l’UE vul terminar l’obligaziun da visum per Tircs – uschè svelt che Ankara ha ademplì tuttas premissas per quai. In sboz da lescha correspundent è avant maun dapi mezdi a Brüssel. La cumissaria da l’UE Margrethe Vestager ha tramess ina fotografia dal conclus via twitter.

Anc 72 cundiziuns d’ademplir

L’aboliziun da l’obligatori da visum schabegia però cun la resalva che la Tirchia adempleschia las premissas restantas da l’UE, hai gì num a Brüssel.

Actualmain sajan anc avertas tschintg da 72 cundiziuns, ha ditg il vicepresident da la cumissiun. Il pajais haja fatg «svilups impressiunants» e vegnia ad ademplir las cundiziuns sch’el mantegnia il tempo da refurma.

Ils criteris restants tractan il cumbat cunter la corrupziun, la collavuraziun cun l’autoritad da polizia da l’UE Europol, la collavuraziun cun la giustia cun ils stadis da l’UE, la protecziun da datas e leschas davart il cumbat cunter il terrorissem.

Introducziun fin la fin da zercladur

Ils pass biometrics che l’UE ha pretendì na vegn la Tirchia betg a pudair introducir ad uras. Sco soluziun intermediara duai la Tirchia dar ora pass biometrics ch’èn mo curt valaivels e che cuntegnan ina fotografia ed improntas dal det. A partir dal zercladur pon uschia be burgais tircs cun quests pass pudair viagiar senza visum en l’Europa. A partir da l’october duai la Tirchia lura introducir pass che correspundan cumplettamain als standards da l’UE.

La data fixada per entradas senza visum è la fin da zercladur. Concret va quai per fermadas curtas fin a 90 dis aifer il spazi da Schengen ch’è atgnamain senza controllas da cunfin.

Regulaziun vala er per la Svizra

Sco pajais da Schengen sto la Svizra surpigliar la liberalisaziun dal visum. Entras Schengen è vegnì stgaffì in spazi europeic communabel senza cunfins entaifer quel. La Svizra tutga tar quest spazi da Schengen tras cunvegnas associativas.

Cura che l’UE ha lura decis la liberaziun da visum per burgais tircs, restan a la Svizra 30 dis per adattar sia basa giuridica e da communitgar a l’UE, schebain ella surpiglia questa cunvegna.

RR novitads 14:00