Siglir tar il cuntegn
Inhalt

Exteriur Cumbats intensivs en l’Ucraina da l’ost

En la vischinanza dal vitg Schirokin en l’ost da l’Ucraina hai dà intensivs cumbats. Quai rapportan observaturs da l’Organisaziun per la segirezza e la collavuraziun en l’Europa (OSCE).

In convoi dals separatists pro-russ.
Legenda: In convoi dals separatists pro-russ. Keystone

Era armas grevas sajan vegnidas en acziun. Il vitg Schirokin è radund 20 kilometers davent da la citad da Mariupol, l’ultima citad gronda en la regiun anc en ils mauns da la regenza ucranaisa.

Il favrer aveva la regenza ucranaisa ed il separatists sustegnids da la Russia suttascrit in armistizi che prevesa surtut la retratga da las armas grevas ord la regiun. Sco la OSCE scriva, vegnia la cunvegna per gronda part respectada, entant dettia quai adina puspè cumbats en la regiun.

Discurs davart refurmas en l'Ucraina

Entant en il president da la Cumissiun da l’Uniun Europeica Jean-Claude Juncker ed il president dal Cussegl d’Europa Donald Tusk s’inscuntrads oz en l’Ucraina cun il president ucranais Petro Poroschenko.

Tema central duai ina approximaziun da l’Ucraina a l’Uniun Europeica esser. Vinavant vulan ils represchentants da l’Uniun Europeica discutar sur da refurmas en l’Ucraina. Sco quai ch’il president dal cussegl ha ditg, gidan ils stadis europeics, ma l’Ucraina stoppia era sa midar.

RR novitads 12:00 / 14:00