Siglir tar il cuntegn

Header

cuntegn

Cumbat electoral Adia Merkel e bainvegni Scholz, Laschet u Baerbock?

Suenter 16 onns sco chanceliera tudestga va l'era d'Angela Merkel (CDU) a fin. Mo tgi daventa successur u successura? Armin Laschet (CDU), Olaf Scholz (SPD) ed Annalena Baerbock (Verds) cumbattan per vegnir nov chancelier u chanceliera tudestga.

I spetga ina dumengia d'elecziun plain tensiun en Germania . La correspundenta dad SRF a Berlin, Bettina Ramseier quinta cun resultats stretgs. La CDU, la SPD ed era ils Verds speran da pudair far la cursa e da daventar la ferma partida en il pajais.

Nagin fascinescha

Las ultimas retschertgas tschontschan per la partida da la SPD cun il candidat Olaf Scholz. En bleras retschertgas vegn la partida sin bun 25% da las vuschs. La CDU/CSU cun Armin Laschet vegn sin bun 20% da las vuschs e la partida Verda cun Annalena Baerbock sin 15%. Suenter suondan la FDP cun 12% e la AfD cun 11%.

Nagin dals trais candidats principals vegn da fascinar la populaziun.
Autur: Bettina Ramseier Correspundenta dad SRF a Berlin

Angela Merkel di adia suenter 16 onns

Dapi il 2005 è Angela Merkel a la testa da la Germania. Cun las elecziuns dals 26 da settember va ina era a fin. Insatge che ha adina accumpagnà ella durant quest temp è il «nus», manegia Bettina Ramseier. Merkel haja adina empruvà dad esser ina chanceliera per tuttas e tuts. Ed ella ha durant ils ultims onns mussà che sia gronda fermezza è il managament da crisa: Crisa da fugitivs, crisa dal euro, crisa da finanzas, crisa da corona. Da nagut ha Angela Merkel laschà stermentar e manà la Germania ord las crisas.

La dunna da 67 vegnia dentant er a restar en memoria sco chanceliera che n'ha betg gughegià la massa, di la correspundenta dad SRF. Ella n'ha mai gì visiuns e laschia enavos enqual plazzal suenter 16 onns a la testa. Per exempel quai che pertutga la politica dal clima u era sch'i giaja per la digitalisaziun nua che la Germania haja propi durmì ils ultims onns.

Angela Merkel
Legenda: Angela Merkel Durant ils ultims 16 onns ha ella regì il pajais. Keystone

Suenter 16 onns datti ina midada en Germania. Angela Merkel banduna la tribuna gronda. Ils ins dian ch'i saja uras, ils auters vessan gugent ch'i gess vinavant cun ella a la testa.

Gist uss cura che la populaziun vesa las alternativas, vegnan blers melanconics ch'ella na vegn betg pli ad esser chanceliera tudestga.
Autur: Bettina Ramseier correspundenta dad SRF a Berlin

RTR actualitad 07:00

Artitgels legids il pli savens