Siglir tar il cuntegn

Header

cuntegn

Exteriur Crusch Cotschna Svizra è pronta per Sulawesi

La Crusch Cotschna Svizra ha tramess in spezialist da logistica en il territori da catastrofa sin l'insla Sulawesi. Diesch ulteriuras persunas èn prontas per ir en il lieu per prestar l'agid d'urgenza.

  • 100 persunas èn en servetsch per la Crusch Cotschna Svizra. Diesch da questas èn prontas per ir en l'Indonesia.
  • La federaziun internaziunala da la Crusch Cotschna quinta d'impunder 22 milliuns francs per l'agid urgent e la reconstrucziun dals bajetgs.
  • Projects d'agid vegnan sustegnì da la Chadaina da Fortuna cun 80%. 20% sto la Crusch Cotschna (sco era autras organisaziuns umanitaras) pajar cun agens daners, vul dir cun donaziuns directas.

audio
Saira: La Crusch Cotschna Svizra è pronta
ord Actualitad dals 04.10.2018.
laschar ir. Durada: 3 minutas 9 Secundas.

L'emprim organisar e lura gidar

Collavuraturs da la Crusch Cotschna indonaisa èn stads ils emprims gidanters en il lieu da catastrofa sin l'insla Sulawesi. Ensemen cun la federaziun internaziunala da la Crusch Cotschna han els clamà experts da logistica en il lieu. La Crusch Cotschna Svizra ha tramess ina persuna per sa gidar cun l'organisaziun. Tenor Katharina Schindler, la pledadra dal departament per la collavuraziun internaziunala da la Crusch Cotschna, saja quai fitg impurtant da sclerir l'emprim la situaziun en in lieu e da coordinar cun las autras organisaziuns umanitaras, avant che trametter colonnas d'agid. Uschia possian era vegnir evitai conflicts tranter las differentas organisaziuns.

100 persunas en acziun per la Crusch Cotschna Svizra

A la Crusch Cotschna Svizra stattan a disposiziun 50 persunas da la logistica e tuttina bleras or dal sectur medicinal. Las bleras persunas èn dentant en in process da lavur e ston organisar lur absenzas cun il patrun. In engaschament en in territori da catastrofa cuzza normalmain in mais. Alura vegnan ils teams barattads. Il mument èn diesch persunas prontas per il servetsch en l'Indonesia.

Crusch Cotschna quinta cun 22 milliuns francs

La federaziun internaziunala da la Crusch Cotschna quinta d'impunder 22 milliuns francs per l'agid d'urgenza fin la reconstrucziun dals bajetgs. Cunquai che l'entira dimensiun da la catastrofa n'è anc betg survesaivla, saja quai dentant grev da stimar ils donns.

audio
Bunura: Chadaina da fortuna – Crusch Cotschna po fa diever dals daners
ord Actualitad dals 05.10.2018.
laschar ir. Durada: 2 minutas 34 Secundas.

Il tsunami d'avant 14 onns, che ha tranter auter era tschiffà la regiun dad Aceh en l'Indonesia, saja stada ina da las pli grondas catastrofas nua che la Crusch Cotschna haja gidà. Quest eveniment haja dentant era purtà midadas e svilup en l'organisaziun. Uschia vegnia dapi lura dà pli gronda paisa a la reconstrucziun dals bajetgs. Era survegnian ils pertutgads ussa era sustegn finanzial direct. Els sappian numnadamain il meglier, tge basegns ch'els hajan e possian uschia cumprar sez quai ch'els dovrian il pli urgent.

80% da la Chadaina da Fortuna

La Chadaina da Fortuna sustegn cun 80% projects d'agid da las organisaziuns umanitaras. Il rest sto mintga organisaziun impunder sez. Tenor la pledadra Katharina Schindler saja era pussaivel che la Crusch Cotschna survegnia uschè bleras donaziuns directas, ch'ella po schizunt finanziar dapli da ses agens projects.

Di da rimnada naziunal

Avrir la box Serrar la box

RTR rimna per ils umans en l'Indonesia

Venderdi proxim, ils 5 d'october 2018, rimna la Chadaina da Fortuna ensemen cun la SRG SSR daners per ils umans en l'Indonesia ch'èn pertutgads dal tsunami e terratrembel. Ina da las centralas da collecta da telefon vegn endrizzada tar RTR a Cuira.

Durant il di naziunal da collecta pon vegnir annunziadas donaziuns a partir da la damaun a las 07:00 enfin las 23:00 via il numer da telefon gratuit 0800 87 07 07. Donaziuns pon ins far da tut temp online via www.glueckskette.ch, il link avra en ina nova fanestra.

Artitgels legids il pli savens