Siglir tar il cuntegn
Inhalt

Exteriur Critica inacceptabla pertutgant il referendum en Tirchia

Il ministeri da l'exteriur tirc refusa la critica d'observaders da l'Organisaziun per la segirezza e la collavuraziun en l'Europa.

Il president tirc discurra tar aderents entant ch'il ministeri da l'exteriur refusa critica da l'OSCE.
Legenda: Il president tirc discurra tar aderents entant ch'il ministeri da l'exteriur refusa critica da l'OSCE. Keystone

La critica che la votaziun davart la refurma da la constituziun haja cuntrafatg a standards internaziunals saja inacceptabla, ha communitgà il ministeri da l'intern tirc. Ils observaders da l'Organisaziun per la segirezza e la collavuraziun en l'Europa avevan tranter auter crititgà che la cumissiun da votaziun haja lubì cedels da votar inuffizials. Quai cuntrafetschi a standards internaziunals. Era l'opposiziun tirca aveva crititgà fermamain quai e pretendì che las vuschs vegnian anc ina giada dumbradas.

Protestas ad Istanbul

En la metropola tirca d'Istanbul han entant radund 2'000 persunas demonstrà cunter il schef da stadi Recep Tayyip Erdogan. Ils demonstrants han tranter auter scandà: «Erdogan, lader, assassin.»

Ils Tircs e las Tircas han approvà ier la refurma da la constituziun cun passa 51% da las vuschs. La refurma munta ch'il president tirc survegn marcantamain dapli pussanza.

RR Novitads 20:00