Siglir tar il cuntegn
Inhalt

Exteriur Crisa da Katar: Iran gida e politica tema

Suenter ch’il Katar vegn bloccà dapi radund in’emna da plirs vischins arabs, trametta uss l’Iran plirs aviuns e bastiments cun mangiativas en il Katar. Al medem mument crescha en politica ed economia la tema dad in’escalaziun militara dal conflict en il Golf.

In aviun per terra.
Legenda: Bloccada cumpletta – er il traffic d'aviuns dad ed en il Katar vegn impedì dals vischins arabs. Keystone

Fertant ch’ils stadis enturn il Golf sa dispitan durant la fin d’emna vinavant, ha admonì il minister da l’exteriur tudestg Sigmar Gabriel dal privel dad ina guerra.

Experts economics admoneschan, che las bancas da Katar hajan da cumbatter pli e pli cun difficultads. Ina prova dad intermediar da Kuwait n’ha anc betg purtà fritg.

Katar survegn sustegn da l’Iran

Entant sa furma er sustegn per Katar. Il grond vischin Iran, sez en posiziun plitost isolada en il Golf, porscha maun cun trametter vivondas. Tenor l’agentura da novitads iranaisa Irna ha l’Iran tramess cun aviuns e bastiments passa 500 tonnas vivondas vers il Katar. Sch'il Katar giavischia vegnia a dar ulteriuras furniziuns.

L’Iran gida actualmain gia a garantir il traffic d’aviuns en il Katar. El lascha sgular ils aviuns da Qatar Airways sur ses territori vers o davent da l’Emirat.

Escalaziun cumenzà avant radund in emna

Il glindesdi passà avevan l'Arabia Saudita, l’Egipta, il Bahrain ed ils Emirats Arabs Unids interrut las relaziuns diplomaticas tar il Katar e bloccà il pajais totalmain.

Sut la batgetta da l’Arabia Saudita rinfatschan els al pajais da finanziar organisaziuns terroristicas. Tenor observaders pudess dentant er giugar la relativamain buna relaziun dal Katar cun l’Iran ina rolla en las acziuns dals vischins arabs.

RR novitads 09:00++