Siglir tar il cuntegn
Inhalt

Exteriur Crisa da Katar cuntinua: En mira da vischins ed attatgas da cyber

Il conflict tranter differents pajais arabs ed il Katar escalescha. L’Arabia Saudita, ils Emirats Arabs Unids, il Bahrain e l’Egipta han publitgà ina glista da terrorists che duajan vegnir sustegnids dal Katar.

In collavuratur passa sper il logo da l'emettur katari Al-Dschasira a Doha, la chapitala da Katar, via.
Legenda: In collavuratur passa sper il logo da l'emettur katari Al-Dschasira a Doha, la chapitala da Katar, via. Keystone

Ils stadis arabs communitgeschan en ina decleraziun communabla, ch'ils contos da passa 60 persunas e 12 organisaziuns vegnian bloccads e lur fatschentas cun l’exteriur engrevgiadas.

Attatgas da cyber massivas sin emetturs da televisiun da Katar

Amez la crisa han rapportà l’emettur da televisiun statal da Katar e l’emettur da televisiun Al-Dschasira dad esser en il focus da massivas attatgas da cyber. Uschia sajan las paginas e las plattafurmas digitalas dad Al-Dschasira stadas expostas ad attatgas da hackers sistematicas e cuntinuantas.

La televisiun statala aveva deactivà sia pagina en la rait or da «raschuns da segirezza», dapli n’è anc betg vegnì enconuschent.

Katar fa valair attatga da hacker al cumenzament da la crisa actuala

Ils 4 pajais arabs sut la batgetta da l’Arabia Saudita avevan decis quest’emna d’interrumper lur relaziuns cun il Katar e d’isolar l’emirat. Els reproschan al Katar da sustegnair il terrorissem.

Katar percunter argumentescha, che si’agentura da novitads statala saja vegnida hackada cun in’infurmaziun faussa per engrevgiar las tensiuns diplomaticas al Golf.

RR novitads 06:00