Siglir tar il cuntegn

Header

Navigaziun

Electricitad è stgars en Venezuela - er en la chapitala Caracas.
Legenda: Electricitad è stgars en Venezuela, er en la chapitala Caracas. Keystone
cuntegn

Exteriur Crisa d'energia en Venezuela

En la Venezuela è vegnì tschentà anavon l'ura per ina mes'ura. Quai per che la populaziun sappi nizzegiar pli ditg la glisch dal di. La Venezuela sto numnadamain spargnar energia.

Midar l'ura per pudair nizzegiar pli ditg la glisch dal di n'è betg la suletta mesira che la regenza ha prendì. Il president actual da la Venezuela, Nicolàs Maduro ha reducì il temp da lavur dals emploiads dal stadi sin 4 e perfin sin 2 dis. Plinavon ha Maduro raziunalisà l'electricitad. Mintga di vegn ella stizzada per 4 uras. Er ha el dacurt schizunt supplitgà las dunnas da na betg pli far diever dal favugn per sientar chavels.

L'opposiziun dat la culpa da la miseria al president. El haja tralaschà d' investir en ovras electricas modernas. Malgrad ch'il sulegl sclereschia en la Venezuela en abundanza, na dettia quasi nagins implants solars.

Maduro fa dentant respunsabla la crisa da l'ieli ee il fenomen dal clima El Nino. Entras El Nino saja il lai da fermada da Guri quasi sientà. E cun quest lai vegn producì energia per 70% da la Venezuela.