Sch'ina persuna u ina gruppa mettian adina puspè si talas infurmaziuns faussas, vegnian ils accounts stizzads. Plinavant vul Facebook far pli simpel a ses utilisaders da s'infurmar nua e cura ch'i pon vegnir vaccinads.
Sin Instagram, che tutga er a Facebook, vegnia plinavant ad esser pli grev da chattar accounts da persunas che scusseglian da laschar vaccinar.
Critica envers Facebook resta
Facebook collavura dapi mais cun las organisaziuns da sanadad grondas, per uschia pudair infurmar a moda correcta davart la pandemia. «Passa 2 milliardas persunas en 189 pajais èn uschia vegnidas vid infurmaziuns fidablas», pretenda Facebook.
Ma critichers da Facebook n'èn betg persvas. «Facebook ha empermess l'onn passà pliras giadas dad agir encunter infurmaziuns faussas en connex cun il vaccin da corona», ha twittà l'organisaziun nunguvernamentala Center for Countering Digital Hate. «Mintga giada manchentan els lur atgnas finamiras.»