Tut ils abitants e las abitantas da l'Engalterra duain bainprest pudair sa laschar testar duas giadas l'emna gratuitamain sin il coronavirus. Ils tests vegnan purschids en scolas e firmas sco er en centers da test locals. Fin uss eran tests svelts gratuits reservads per gruppas spezialmain periclitadas.
Schluccadas a partir dals 12 d'avrigl
Il testar saja absolut necessari per betg periclitar ils success da la campagna da vaccinar, durant las schluccadas planisadas, ha ditg il primminister Boris Johnson. Grazia ad in lockdown sever ed a la campagna da vaccinar è il dumber da novas infecziuns ì enavos l'ultim temp marcantamain en l'Engalterra. La incidenza da 7 dis era ultimamain tar 48 cas per 100'000 abitants.
Per ils 12 d'avrigl èn perquai planisadas schluccadas pli grondas. Butias ch'eran uss serradas sco er las terrassas da restaurants duain lura puspè avrir. Inscunters privats en locals serrads sco er viadis en l'exteriur restan dentant anc scumandads fin almain mez da matg.
La regenza a Londra è responsabla per las mesiras en l'Engalterra. En la Scozia, la Valisa e l'Irlanda dal Nord tutga quella incumbensa a las regenzas regiunalas.
Ord l'archiv da 10vor10:
