Siglir tar il cuntegn
cuntegn

Exteriur Corea dal Sid ponderescha d'agir cunter valutas virtualas

La Corea dal Sid ponderescha da serrar tut las plattafurmas localas che lavuran cun valutas virtualas. Quai tenor la cumissiun per servetschs finanzials.

maletg simbolic per valutas vitualas
Legenda: Dapi l'introducziun dal Bitcoin (2009) datti adina dapli valutas virtualas. Reuters

Ins examineschia, schebain serrar tut las plattafurmas, ubain era mo questas che cuntrafetschian a la lescha, ha ditg il schef da la cumissiun per servetschs da finanzas Choi Jong Ku. S'exprimì è Ku suenter ch'ina da las valutas virtualas – il Bitcoin – era vegnida sut squitsch.

Avant avevan medias sidcocreanas rapportà ch'il stadi pondereschia da scumandar valutas virtualas. La Corea dal Sid vala sco in dals centers per speculaziuns cun valutas virtualas.

Gia avant avevan medias en l'Asia rapportà che la China pondereschia da bloccar il commerzi cun talas valutas virtualas.

Valutas volatilas

La valuta virtuala la pli enconuschenta Bitcoin è fitg volatila. Avant in onn valeva il Bitcoin anc main che 1000 dollars. Aifer dus mais era il curs dal Bitcoin sa dublegià sin 20'000 dollars. Dacurt è'l però puspè crudà sut 10'000 dollars. Dapi mesemna è il curs sa reducì per 27%.

RR novitads 09:00

cripto-valuta

Valutas virtualas, ubain cripto-valutas, èn meds da pajar che na sa basan betg sin ina banca centrala, mabain sin la confidenza en la valuta sezza. L'emprima tala valuta è il Bitcoin (2009). Dapi lura datti adina dapli da questas valutas. Crititgà vegn ch'i pussibiliteschian pajaments anonims en la rait.