Siglir tar il cuntegn
Inhalt

Exteriur Corea dal Nord vul smetter da far tests nuclears

Il dictatur da la Corea dal Nord, Kim Jong Un, vul ussa pasch e progress economic enstagl da tests nuclears e da rachetas. Tenor l’agentura uffiziala nord-coreana KCNA ha il dictatur nord-corean ditg ch’il armament nuclear saja a fin.

Purtret da Kim Jong Un.
Legenda: Dictatur da la Corea dal Nord Kim Jong Un. Keystone

A partir d’immediat vegnian tests per armas nuclearas e rachetas sistids. L’areal per tests nuclears en il nord dal pajais vegnia serrà, uschia Kim. Ils areals hajan «ademplì lur duairs». La Corea dal Nord veglia, en in dialog cun la cuminanza internaziunala, cuntanscher pasch e progress economic. La decisiun saja vegnida prendida en ina sesida dal comité central da la regenza.

Emprimas reacziuns sin questa buna nova

La Corea dal Sid, la China ed ils Stadis Unids beneventan las intenziuns da la Corea dal Nord. Il Giapun percunter ha exprimì dubis. Il schef da la regenza giapunaisa, Shinzo Abe, percunter ha ditg ch’i sa tractia d'in pass enavant, ma ch’ins stoppia observar bain sche las armas nuclearas vegnan era propi destruidas tras quai.

Quai èn fitg bunas novas per la Corea dal Nord e per il mund.
Autur: Donald Trumppresident dals Stadis Unids

Las tensiuns sin la peninsla coreana sco era il program d’arma nucleara e rachetas da la Corea dal Nord tutgan dapi onns tar ils pli privlus origins da la crisa per la politica internaziunala. Igl è era previs in inscunter suprem tranter Kim e Trump. Sco pussaivel termin ha Donald Trump numnà l’entschatta zercladur.

RR novitads 07:00