Siglir tar il cuntegn

Header

Racheta.
Legenda: L'ultim test da rachetas n'è para betg gartegià a la Corea dal Nord (archiv). Keystone
cuntegn

Exteriur Corea dal Nord testescha racheta senza success

La situaziun sin la Peninsla Coreana resta tendida. Il reschim da Kim Jong Un duai avair testà in'ulteriura racheta.

  • In ulteriur test da rachetas nordcorean ha tenor ils Stadis Unids fatg naufragi.
  • La racheta saja explodida be curt suenter la partenza.
  • Il test è probabel stà ina reacziun sin l'exercizi militar da la Corea dal Sid ed ils Stadis Unids ch'els fan mintg'onn.

Il ministeri da defensiun da la Corea dal Sid ha annunzià d'examinar l'incap. L'agentura da novitads sidcoreana Yonhap rapporta che la racheta saja eventualmain explodida en in'autezza ch'il radar na possia betg tschiffar.

Pli baud aveva l'agentura da novitads giapunaisa Kyodo rapportà che la Corea dal Nord haja probabel fatgs plirs tests da rachetas. Ella sa referescha ad indicaziuns da la regenza. La regenza dal Giapun n'ha però betg confermà quai.

Il reschim a Pjöngjang provochescha

La Corea dal Nord provochescha adina puspè la cuminanza mundiala cun tests da rachetas. L'onn passà ha il pajais isolà fatg dus tests atomars e plirs tests da rachetas. Uschia ha la Corea dal Nord violà pliras resoluziuns dal Cussegl da segirezza da las Naziuns Unidas.

Avant duas emnas ha la Corea dal Nord sajettà quatter rachetas en la Mar Giapunaisa. Sco quai che medias statalas rapportan, dettia ultra da quai tests dad ina nova propulsiun a racheta.

Dapi l'emprim test atomar l'onn 2006 ha il cussegl da segirezza pliras sancziuns cunter la Corea dal Nord.

RR novitads 06:00