Siglir tar il cuntegn

Exteriur Corea dal Nord-Stadis Unids: 3 praschuniers americans pon turnar

Quai ha communitgà il president american Donald Trump via il servetsch da messadis curts Twitter.

Portrait dad els trais.
Legenda: En Corea dal Nord vegn rapportà dals 3 Americans en fermanza: Kim Dong Chul, Tony Kim e Kim Hak (da san.). Keystone

Ils trais burgais americans sa rechattian en l'aviun ensemen cun il minister da l'exteriur american Mike Pompeo. Pompeo aveva visità la Corea dal Nord per preparar l'inscunter suprem tranter il president american Donald Trump ed il dictatur nordcorean Kim Jong Un.

Donald Trump è cuntent da pudair annunziar, ch'ils trais americans turnan:

Ils trais umens americans eran dapi intgins onns en la Corea dal Nord en la praschun. I sa tractia da dus docents da l'universitad per scienza e tecnologia ada Pjöngjang ed in missiunar. Els paran dad esser sauns, scriva Trump. Il president sez vegnia a beneventar els cur ch'els arrivan la notg sin la gievgia sin la basa militara dad Andrews.

L'annunzia da Donald Trump da vulair beneventar il minister ed ils trais umens persunalmain:

Washington aveva insistì che la Corea dal Nord libereschia ils trais praschuniers avant l'inscunter sco «segn da buna veglia». L'inscunter da Pompeo e Kim Jong Un saja stà in success, ha Trump communitgà. Lieu e termin sajan vegnids fixads – detagls n'ha el dentant betg tradì.

RR novitads 16:00