Siglir tar il cuntegn

Exteriur Corea dal Nord smanatscha da dir giu l'inscunter cun Trump

La Corea dal Nord metta en dumonda l'inscunter suprem dal potentat Kim Jong Un cun il president american Donald Trump. Pjöngjang n'haja nagin interess a l'inscunter sche quel sa basia sin pretensiuns unilateralas. Quai ha communitgà in represchentant da la regenza.

Fotomontscha da Donald Trump e Kim Jong Un .
Legenda: La Corea dal Nord metta en dumonda l'inscunter tranter il president american Donald Trump ed dal potentat Kim Jong Un (fotomontascha). Keystone

Sche la regenza americana chatschia els a chantun e pretendia dad els da desister sin armas atomaras, lura n'hajan els nagin interess pli vi dals discurs, ha il viceminister da l'exteriur nordcorean detg. Ina denuclearisaziun da la Corea dal Nord tenor l'exempel da la Siria, na vegni per els betg en dumonda.

Intginas uras avant ha la Corea dal Nord detg giu ils discurs da contractivas cun la Corea dal Sid pervia da manevers militars ch'ils Stadis Unids e la Corea dal Sid fan actualmain. Là vegn imità l'invasiun da la Corea dal Nord e quai saja ina provocaziun, uschia lur argument. Ils Stadis Unids han declerà, ch'ils manevers, che giajan anc fin ils 25 da matg, sajan defensivs e sulet rutina.

L'inscunter suprem da Kim Jong Un cun Donald Trump è planisà a Singapur ils 12 da zercladur.

Reacziun da la Corea dal Sid

La Corea dal Sid deplorescha la sditga surprendenta dals discurs da reconciliaziun da la Corea dal Nord. Il ministeri da defensiun a Seoul ha appellà al pajais vischin, da far uschè baud sco pussaivel ils discurs che servian a la pasch ed al bainstar da la peninsla coreana. La regenza saja decidida da realisar la decleranza communabla da l'inscunter suprem bilateral da la fin d'avrigl.

RR novitads 06:00