Siglir tar il cuntegn
Inhalt

Exteriur Corea dal Nord smanatscha avertamain cun culp atomar

La Corea dal Nord ha smanatschà als Stadis Unids avertamain cun in'attatga atomara. «Sch'ils Stadis unids ristgan da mussar in segn d'ina emprova d'eliminar nossa regenza, vegnin nus a far cun noss martè atomar in culp crudaivel amez il cor dals Stadis unids», uschia l'agentura statala KCNA.

Purtret da Kim Jong Un.
Legenda: La regenza da la Cora dal Nord smanatscha avertamain als Stadis Unids. Keystone

L'emna passada aveva il directur dal CIA, Mike Pompeo ditg che l'impurtant saja ch'ils Stadis unids vesian ina pussaivladad da separar la regenza nordcoreana enturn Kim Jong Un da las armas atomaras. Pompeo haja cun quai surpassà in cunfin. Ussa saja cler che la finamira da la regenza da Trump saja da midar ora la regenza en la Corea dal Nord, uschia il ministeri da l'exteriur da la Corea dal Nord.

Preparaziuns per in ulteriur test atomar

Tenor indicaziuns dals Stadis Unids pudess la Corea dal Nord esser vidlonder da preparar in nov test da rachetas. Sin in areal da test en il nordvest da la chapitala Pjöngjang saja d'observar activitads pli autas. Quai inditgeschia in start d'ina racheta, uschia ils Stadis Unids.

Pliras giadas cuntrafatg a scumond da l'ONU

Las naziuns unidas han scumandà a la Corea dal Nord da sviluppar u testar rachetas. Tuttina ha il pajais testà ils ultims dus onns tantas rachetas sco anc mai en uschè curt temp. Er dus dad en tut tschintg tests atomars han gì lieu en quest temp.

Il president american, Donald Trump aveva l'entschatta fanadur avertì che l'èra da pazienzia strategica cun al Corea dal nord saja a fin. Plinavant aveva el supplitgà la China da far dapli squitsch sin ses allià.

RR novitads 07:00