Siglir tar il cuntegn
Inhalt

Exteriur Corea dal Nord planiseschia staziunament da satellit

La Corea dal nord planisescha apparentamain da trametter in nov satellit cun ina racheta en il spazi. Quel duai esser equipà cun cameras ed apparats da telecommunicaziun. Quai rapportan medias sidcoreanas sa referind sin circuls da la regenza a Seoul.

Purtret d'in satellit en il spazi.
Legenda: La Corea dal Nord vul apparentamain trametter in satellit en il spazi. Keystone

Il favrer da l'onn passà aveva la Corea dal Nord gia tramess in satellit cun ina racheta en il spazi. La cuminanza internaziunala aveva dentant taxà la partenza da la racheta sco test d'ina racheta ballistica e consequentamain sco surpassament da las resoluziuns da l'ONU.

In pledader dal militar sidcorean haja ditg ch'i saja vegnì observà l'ultim temp nagut extraordinari en la Corea dal Nord. Seoul quintia dentant adina cun novas provocaziuns. Tar quai tutgia era il start d'ina racheta a lunga distanza zuppentada sco start d'in satellit.

Program astronautic da la Corea dal Nord

Pjöngjang ha adina sincerà che lur program astronautic servia sulettamain ad ina finamira scientifica. Rachetas purtantas pon dentant vegnir duvradas per miras civilas sco era militaras. Ils Stadis Unids e la Corea dal sid van perquai or dal cas che Pjöngjang persequitescha autras finamiras e vul cun da quests tests promover ses program da rachetas.

RR novitads 09:00