Siglir tar il cuntegn
cuntegn

Exteriur Consum da cocain – Turitg sin plaz 3 en l'Europa

A Londra vegn consumà il pli savens cocain en la cumparegliaziun europeica – dentant sulettamain durant ils dis da lavur. Las fins d'emna è la citad beltga Antwerpen sin plaz 1. Quai resulta d'ina examinaziun da las auas persas en 50 citads en 18 pajais. La citad da Turitg è l'entir'emna sin plaz 3.

In um fotografà da suten che fa lingias da cocain sa prepara da consumar quel.
Legenda: Bler cocain a Turitg Er a las examinaziuns dal 2015 era la citad gia al spitg tranter las citads svizras (maletg simbolic). Keystone

Davart il consum da cocain è Turitg ina citad cun constanza. Tant durant l’emna sco er las fins d’emna sa chatta ella sin plaz 3 en cumparegliaziun cun auters pajais da l’Europa. Uschia ha Turitg quest onn cuntanschì sia pli auta valur da consum da cocain insumma.

Genevra, Son Gagl e Basilea èn il 2016 sin ils plazs 7 fin 9 dal consum da cocain europeic, Lugano suonda sin plaz 13.

50 citads sut la marella

A Turitg e Basilea han ils experts constatà valurs augmentadas da methamphetamin, la substanza da basa per l’uschenumnà ‘crystal meth’. En cumparegliaziun internaziunala èn omaduas citads da la Svizra Tudestga tranter ils top 15 dal consum da methamphetamin.

Er la droga da party MDMA vegn consumada savens a Turitg, Genevra, Basilea e Son Gagl. Sin plaz 5 è Turitg, lura Genevra sin plaz 12, Basilea sin plaz 17, Son Gagl sin plaz 20 e Berna sin plaz 23.

RR novitads 06:00

L'examinaziun

L’examinaziun vegn mintg’onn fatga dal post d’observaziun europeic per drogas. Durant in’emna han ils perscrutaders examinà las auas persas da passa 50 citads ord 18 pajais.

Pagina web dal post d'observaziun