Passa 470 spezias d’animals vegnan protegidas meglier en il futur. Quai è il resultat da la conferenza da duas emnas en il Panama ch’è sa fatschentada cun la protecziun da spezias d’animals. Ils 184 pajais ch’eran preschents a la conferenza han approvà in pachet da protecziun per squagls e rajas. Quai cunter la voluntad da naziuns da pestga sco per exempel il Giapun.
Il Giapun n'ha betg pudì evitar che per exempel il squagl blau vegn sin la glista. Er blers reptils han ins prendì si da nov.
La protecziun da squagls è cun quai bler pli gronda. Fin uss era mo in quart da tut las spezias protegidas. Uss èn radund 100 spezias da squagls e rajas protegidas, tranter auter quellas che vegnan pestgadas pervia da lur charn ed lur nudaglias.
La glista da protecziun
Sin la glista da spezias protegidas da la conferenza da spezias globala èn gia radund 38'000 spezias. Tar las 470 che vegnan agiuntadas appartegnan per l'emprima giada era plantas tropicas. Las spezias sin la glista dastgan mo pli vegnir nizzegiadas per in commerzi persistent.
Il WWF crititgescha ch'i na saja betg gartegià da proteger spezias che vegnian pigliadas per terraris en l'Europa, sco per exempel serps, tartarugas e rustgs ch'èn en privel da svanir.
