Latiers duai vegnir stgaffì tar la polizia federala ina nova squadra, la Passenger Information Unit. Quella duai pudair examinar ed analisar las datas da passagiers da sgol. Uschia duain persunas suspectusas vegnir eruidas, ha la directura da la Fedpol, Nicoletta della Valle, ditg envers radio SRF. La nova squadra duai avair 15 fin 30 persunas e sa cumponer d'emploiads dal chantuns e dals corps da la guardia da cunfin. Fedpol vegnia a far la dumonda al cussegl federal, uschia della Valle.
Radund 50 milliuns datas da passagiers da sgols van tenor la della Valle mintg'onn tras la Svizra. Davent da la fin matg sto la Svizra dar a l'Uniun europeica tuttas datas da sgols en la UE. Gia oz fa la Svizra quai cun ils Stadis Unids ed il Canada.
Datas privatas
I sa tracta da datas persunalas sco il num, numers da cartas da credit, datas dal viadi, infurmaziuns da la valischa, da contact e dals giavischs da maglia. Quellas datas vegnan arcunadas durant sis mais, per gidar la polizia d'impedir attatgas ni auters delicts.
RR novitads 14:00