La procura publica svizra aveva sentenzià il concern da construcziun Odebrecht ed ina societad affiliada en connex cun il cas da corrupziun internaziunal dal concern d'ieli Petrobas. Ella aveva pretendì dapli che 200 milliuns francs per la Svizra.
Odebrecht e la societad affiliada, Braskem avevan confess gia il december. L'emprim era vegnì decidì ina pli auta summa. Odebrecht ha dentant pudì sa dustar cun l'argument da na betg pudair supportar ina summa pli auta che quella ch'è ussa vegnida decidida.
Corrupziun en 12 pajais
Il concern duai avair corrut funcziunaris en 12 pajais, sur tut en l'America latina. Quai cun en tut 780 milliuns dollars per survegnir incumbensas da la regenza. Per part duain ils daners esser ids sur bancas dals Stadis Unids.
Il tribunal suprem da la Brasilia aveva dà l'emna passada ses consentiment per investigaziuns pervi dal suspect da corrupziun cunter nov ministers dal president conservativ Michel Temer.
Plinavant ha il tribunal suprem abolì l'immunitad per plirs tozzels da deputads e commembers dal senat sco era trais guvernaturs per pudair investigar lur connex cun la rait da corrupziun d'Oderbrecht.
RR novitads 06:00