Siglir tar il cuntegn
Inhalt

Exteriur Columbia: UNO destruescha 69 tonnas armas e muniziun

L’ONU ha neutralisà e surdà var 69 tonnas dad armas e muniziun dals anteriurs rebels da la Farc a la regenza da la Columbia. Las armas deactivadas vegnian ussa luentadas.

Armas dals rebels da la Farc vegnan luentadas.
Legenda: Armas dals rebels da la Farc vegnan luentadas (maletg d'achiv). Keystone

Or dal rest da las armas e da la muniziun vegnian fatgs monuments commemorativs da la pasch che tiran endament la fin da la guerra, ha communitgà l’ONU.

Ils monuments commemorativs vegnan mess si en Columbia, a New York, nua che la sedia da l’ONU è ed a Havanna, nua ch’han gì lieu las tractativas da pasch. Quellas tractativas han cuzzà bunamain quatter onns.

Dispita ha custà a 220'000 persunas la vita

La regenza da la Columbia e la Farc han l'onn passà suttascrit ina cunvegna da pasch. Il president Juan Manuel Santos è vegnì undrà cun il Premi da Nobel per la pasch. Tar las dispitas tranter las forzas da segirezza, il rebels e la furmaziun paramilitara èn dapi mez dals onns 1960 dapli che 220'000 persunas vegnidas per la vita.

RR novitads 12:00