Siglir tar il cuntegn

Header

Navigaziun

Demonstrants en la Columbia.
Legenda: Ils discurs da pasch duain avair lieu a Quito, sco ils negoziaders han communitgà. Keystone
cuntegn

Exteriur Columbia: Regenza negoziescha cun gruppa da gueriglia

Suenter ch'il suveran columbian ha refusà la cunvegna da pasch cun ils rebels da Farc, vul il president manar discurs da pasch cun ils rebels da ELN.

Il president da la Columbia, Juan Manuel Santos, vul suenter la cunvegna cun la Farc, era far ina cunvegna da pasch cun la pli pitschna gruppa da gueriglia ELN. Las contractivas duain cumenzar la fin d'october a Quito, la chapitala da l'Ecuador.

Quai communitgeschan represchentants da la regenza sco er da la ELN ch'èn s'inscuntrads a Caracas. Ils discurs duain vegnir sustegnids da las regenzas da l'Ecuador, Cuba, Chile, Brasilia e da la Norvegia. La regenza columbiana pretenda da la ELN tranter auter da laschar liber tut ils praschuniers.

Co vinavant suenter il na a l'urna

A l'urna ha il suveran columbian refusà l’entschatta d’october il plan da pasch da sia regenza cun ils rebels da la Farc. Suenter il naufragi dal referendum davart la cunvegna da pasch en la Columbia ha il president Juan Manuel Santos prolungà l’armistizi cun ils rebels da la FARC fin la fin da quest mais. El speria che fin là possian els concretisar la cunvegna e reglar il conflict, ha ditg il president Santos. Pervi da ses engaschi per la pasch cun ils rebels da la Farc vegn Santos undrà cun il Premi Nobel da pasch 2016.

RR novitads 06:00

Tgi è la ELN

La marxistica Ejército de Liberación Nacional (l’armada da liberaziun naziunala) è vegnida fundada il 1964 e s’orientava l’entschatta a las scrittiras dal revoluziunari Che Guevara. Cun circa 1’500 cumbattants ha ella in quart da la fermezza da la Farc.