Siglir tar il cuntegn

Header

Navigaziun

Il president da la Columbia Juan Manuel Santos.
Legenda: Il president da la Columbia Juan Manuel Santos. Keystone
cuntegn

Exteriur Columbia: cun nov schlantsch vers la pasch

La regenza columbiana e la gruppa da rebels Farc èn sa cunvegnids sin ina nova cunvegna da pasch modifitgada. Questa nova cunvegna duai resguardar pli fitg ils interess da las diversas gruppas, decleran omaduas varts.

Tranter auter prevesa la versiun nova da la cunvegna chastis d'arrest pli severs per commembers da la Farc che han commess crims da guerra. Quai era ina da las criticas centralas da la versiun veglia. Ultra da quai duain talas persunas esser exclusas dals uffizis d'elecziun.

La nova cunvegna na sto betg pli vegnir approvada da la populaziun, mabain be dal congress. L'emprima versiun da la cunvegna da pasch avevan ils Columbians refusà il cumenzament d'october.

Per sias stentas da cuntanscher pasch en la Columbia ha il president Juan Manuel Santos survegnì da curt il Premi Nobel per la pasch.

RR novitads 6:00