Siglir tar il cuntegn
Inhalt

Exteriur Cloms per dapli toleranza

Pliras milli persunas èn sa radunadas la sonda en il center da Hamburg a manifestaziuns e demonstraziuns cunter l'odi cunter ils esters e per dapli toleranza. Las manifestaziuns sa drizzavan cunter in manifestaziuns dad extremists da la dretga ch’è dentant vegnì scumandà avant.

Ils demonstrants en il center da Hamburg.
Legenda: Ils demonstrants en il center da Hamburg. Keystone

A la staziun principala han tenor la polizia bun 14'000 persunas demonstrà. Ed avant la chasa-cumin sajan bun 7’500 sa radunadas a la manifestaziun «Hamburg bekennt Farbe». Tar las manifestaziuns saja tut stà ruassaivel – cun ina excepziun.

Cravals a la staziun

A la staziun principala ha quai dentant dà cravals cun demonstrants da la sanestra, cunquai ch’els han supponì neonazis en ils trens, uschia la polizia. Els hajan bittà crappa sin trens, hajan envidà fieus artifizials ed attatgà la polizia cun gas irritant. Uschia ch’il traffic da tren ha per part stuì vegnir interrut.

«Keen Platz für Nazis!!!»

A l’acziun da protest cunter la dretga a Hamburg è tranter auter er il teater da la citad sa participà. «Nagin plaz per nazis», steva uschia per exempel scrit sin ina gronda bandiera vid la fatschada dal bajetg dal teater da Hamburg. Il teater Ohnsorg ha fatg quai cun la varianta en tudestg bass: «Keen Platz für Nazis!!!»

«Di dals patriots tudestgs»

Ina demonstraziun dals extremists da la dretga e da hooligans a Hamburg è perencunter vegnidas scumandada. Il Tribunal constituziunal federal ha refusà in recurs dals organisaturs per il «Di dals patriots tudestgs».

RR novitads 14:00