En Frantscha ha il president Emmanuel Macron e ses alliads gudagnà l’emprima runda da las elecziuns dal parlament.
Suenter in’ emprima calculaziun approximativa da l’Institut Kantar Public-onepoint ha la partida da Macron - La République en marche – e ses alliads obtegnì var 32% da las vuschs.
Buna basa per maioritad absoluta
Tenor perscrutaders d’opiniun po Macron uschia far quint cun almain 390 dals 577 sezs en l’assamblea naziunala en la segunda runda da las elecziuns da la proxima fin d’emna. Quai fiss ina clera maioritad absoluta.
Ina schleppa per Macron è però stada la bassa participaziun a las elecziuns. Tenor calculaziuns approximativas è be mintga segund ì a vuschar.
Duscha fraida per las autras partidas
Per las duas partidas da la regenza tradiziunalas è il resultat da l’emprima runda da las elecziuns dal parlament ina duscha fraida. Ils republicans conservativs han obtegnì 21,5% da las vuschs ed èn uschia vegnids sin il segund plaz. Sin plaz trais suonda la partida da dretga Front National da Marine Le Pen cun 14% da las vuschs. La partida socialista da l’anteriur president franzos, François Hollande obtegnì anc 10% da las vuschs. En il passà era quai la partida che cumandava las festas en l’assamblea naziunala.
Macron ha fundà sia partida avant bundant in onn. Ella n'è ni da dretga ni da sanestra.
RR novitads 21:00