Siglir tar il cuntegn
Inhalt

Exteriur Cler favurit tar elecziuns parlamentaras en Serbia

En la Serbia han las elecziuns dal parlament cumenzà. Tenor enquistas pudess la Partida conservativa dal progress (SNS) dal primminister Aleksandar Vucic puspè gudagnar las elecziuns ed uschia survegnir in mandat per s'avischinar a Brüssel. Part da quai pachet fan era dolorusas refurmas economicas.

L'opposiziun renfatscha a Vucic corrupziun e da controllar medias e giustia.
Legenda: L'opposiziun renfatscha a Vucic corrupziun e da controllar medias e giustia. Keystone

Vucic po far quint cun 48 pertschient da la vuschs ed uschia cuntanscher in sumegliant resultat sco avant dus onns. L’anteriur naziunalist da 46 onns aveva proclamà elecziuns anticipadas per survegnir in pli ferm mandat per refurmas economicas e per las tractativas d’entrar en l’UE.

Per entrar en l’Uniun europeica sto Vucic u privatisar pli fitg las interpresas statalas u reducir las perditas da quellas. La consequenza da quests pass vegnan probabel ad esser millis plazzas da lavur che van a perder. En il cas che Vucic gudogna las elecziun vegnì spetgà ch’el cuntinuescha la coaliziun cun ils socialists.

Ultra-naziunals sco ferms adversaris

In problem per la partida da Vucic pudess esser la partida ultra-naziunala SRS che daventa adina pli populara. Il manader dispitaivel da la SRS Vojislav Seselj era vegnì declerà liber dal tribunal per delinquents da guerra a Den Haag.

Tenor enquistas pudess la SRS per l’emprima giada dapi il 2012 puspè entrar en il parlament e daventar la terzferma partida. La SRS s’engascha per colliaziuns pli stretgas cun la Russia. Quai pudess dentant engrevgiar las tractativas per entrar en l’UE.

L’economia en la Serbia sa revegn be plaun da la recessiun. La dischoccupaziun stagnescha tar radund 18 pertschient. Bunamain set milliuns Serbs èn clamads a l’urna. Ils locals d’elecziun serran lur portas a las 20:00 temp svizzer.

RR novitads 09:00