Ils onns 2000 fin 2014 ha in’elevaziun da l’institut Pew a Washington mussà la sminuziun da la classa mesauna en nov da diesch regiuns intercuridas.
En pliras regiuns è la classa mesauna ida enavos, fertant che la classa superiura ed inferiura è creschida. En autras regiuns è be creschida la classa superiura, en autras be l’inferiura. L’institut ha examinà 229 regiuns.
Societad sa separa
Quest studi a lung temp mussa tenor l’institut Pew che la societad americana sa separa adina pli fitg. Cunzunt la classa mesauna giaja enavos en l’entir pajais. Las entradas medias da mintga tegnairchasa (median) èn 8 pertschient pli bassas ch’il 1999. Quai è tenor Pew ina regurdientscha che l’economia sentia anc adina las consequenzas da la gronda recessiun dal 2007 fin 2009.
En in’evaluaziun d’avant intgins mais aveva l’institut constatà che la classa mesauna en ils Stadis Unids n’è per l’emprima giada dapi il 1971 betg pli la maioritad da la societad. Il 2014 muntava ella a 49,9 pertschient. Sco raschuns valan pajas stagnantas, custs creschents ed il grond augment da tegnairchasa ritgs.
RR novitads 12:00