Per franar la pandemia da corona en il Stadis Unids pretendan ils democrats in'obligatori da purtar mascrina en l'entir pajais en il spazi public. Quai fiss gia daditg da far, ha ditg Nancy Pelosi ch’è la parsura democratica da la chombra da represchentants. La regenza da president Trump stoppia finalmain prender serius il privel.
En ils Stadis Unids vegn sulettamain recumandà da purtar ina mascrina sch'i n'è betg pussaivel da mantegnair la distanza. Singuls stadis federativs e singulas citads han introducì sezs in obligatori da purtar mascrina.
Nov record mundial
Il dumber da novas infecziuns cun il coronavirus aifer in di ha cuntanschì in nov record mundial. Tenor indicaziuns da la WHO, l'Organisaziun mundiala da la sanadad, hai dà aifer 24 uras sin l'entir mund 189'000 novas infecziuns.
Er singuls pajais han registrà novs records, sco la Brasilia cun prest 47'000 cas – ed ils Stadis unids cun bun 44'000. Bainbaud surpassa il dumber total d'infecziuns la marca da 10 milliuns. Mortas èn fin uss passa in mez milliuns umans en consequenza da Covid-19.