Siglir tar il cuntegn

Header

cuntegn

Exteriur Christopher Wray daventa nov schef dal FBI

Il giurist è vegnì confermà dal senat cun gronda maioritad. Il senat ha elegì el cun 92 cunter tschintg vuschs.

Christopher Wray vegnia a manar l'uffizi a moda independenta, ha l'um da 50 onns declerà avant paucas emnas durant in'audiziun. Sut George W. Bush ha Christopher Wray lavurà plirs onns per il ministeri da giustia.

Wray suonda a James Comey, quel aveva il president Donald Trump relaschà il matg passà.

Perquai che Trump ha relaschà Comey datti blers che pretendan che Trump haja vulì impedir la giustia. La polizia federala dals Stadis Unids examinescha il mument sche la Russia ed il team d'elecziun da Trump èn sa discurrids durant il proceder per l'elecziun sco president 2016.

Comey aveva declerà il zercladur durant in'audiziun tar il congress che Trump haja supplitgà el da chalar cun las investigaziuns cunter Michael Flynn ch'era lura anc cussegliader da segirezza naziunal. Da sa maschadar en en in process che marscha anc en tala moda po vegnir vesì sco emprova d'impedir la giustia.

Il ministeri da giustia ha ussa mess en in investigader special che maina questas examinaziuns per il FBI.

RR novitads 06:00

Artitgels legids il pli savens