Siglir tar il cuntegn
Inhalt

Exteriur Chombra da represchentants en l'USA approvescha novas sancziuns

La chombra dals represchentants americana ha relaschà in sboz da lescha che prevesa ulteriuras sancziuns cunter la Russia, l'Iran e la Corea dal Nord. Ch'il senat vegn a dar ses consentiment è tant sco segir.

Purtret dal parlament a Washington en l'USA.
Legenda: La chombra da represchentants en ils Stadis Unids ha approvà ina lescha per rinforzar las sancziuns cunter la Russia. Keystone

La lescha da la chombra dals represchentants è vegnida approvada da 419 dals represchentants. Be trais han vuschà cunter. Suenter la chombra dals represchentants sto anc il senat vuschar davart la lescha. Che quel vegn a dar ses consentiment saja tant sco segir. Suenter sto anc il president american, Donald Trump suttascriver la lescha.

Cun la lescha duain Las sancziuns cunter la Russia vegnir rinforzadas punctualmain perquai che hackers russ duain avair intervegnì en il cumbat electoral american. Latiers duai la Russia vegnir punida pervi da l'annecziun da la peninsla Crim e per sias intervenziuns militaras en la Siria. En il cas da l'Iran vai per il program atomar dispitaivel.

La lescha prenda era davent al president Trump la pussaivladad da schluccar en atgna reschia las sancziuns cunter la Russia. En futur stuess Trump preschentar in rapport per schluccar sancziuns. Quai rapport stuess mussar si ch'i giascha en l'interess da segirezza dals Stadis Unids da schluccar las sancziuns.

RR novitads 06:00