China: Danovamain sentenzià in advocat

Ina dretgira a Peking ha sentenzià l'advocat Xia Lin a 12 onns praschun. La politica da persequitar advocats che s'engaschan per ils dretgs umans cuntinuescha.

L'advocat Xia Lin, qua cun la dunna dal artist renumà Ai Weiwei ch'el aveva represchentà avant dretgira.

Legenda da maletgs: L'advocat Xia Lin, qua cun la dunna dal artist renumà Ai Weiwei ch'el aveva represchentà avant dretgira. Keystone

Advocats ed activists èn il mument en il focus da la giustia chinaisa. L'advocat Xia Lin è vegnì sentenzià pervi da cugliunaria. El haja emprestà daners da pliras persunas e firmas e laschà svanir quels, argumentescha la dretgira. Tenor l'organisaziun 'Chinese Human Rights Defenders' haja l'advocat dentant sulettamain emprestà daners dad amis. Quels n'hajan dentant betg purtà plant envers el.

Gia avant trais onns era l'advocat vegnì arrestà. El aveva cumenzà a represchentar avant dretgira simpatisants dal moviment da democrazia a Hongkong. Xia Lin tutga er tar ils advocats ch'aveva represchentà l'artist Ai Weiwei e l'activist prominent Guo Yushan.

Organisaziuns per ils dretgs umans crititgeschan fermamain la sentenzia.
Avant var in onn aveva la China cumenzà a persequitar advocats che s'engaschan per ils dretgs umans - fin uss èn passa 300 persunas pertutgadas.

RR novitads 12:00