Siglir tar il cuntegn
Inhalt

Exteriur China banduna la «politica d’in uffant»

Dapi la fin dals onns 1970 vala en la China l’uschenumnada «politica d’in uffant». La China aveva introducì la limita d’in uffant per famiglia per franar la creschientscha da la populaziun e per animar il svilup economic. Cun ina lescha banduna la China uss uffizialmain questa politica.

Ina famiglia chinaisa.
Legenda: En futur pon uffants chinais crescher si cun lur fragliuns, senza che la famiglia vegn chastiada persuenter. Reuters

La nova lescha annullescha la politica d’in uffant ed entra en vigur il prim da schaner 2016. Uschia pon pèrs maridads en il futur survegnir in segund uffant, communitgescha l’agentura da novitads statala Xinhua. Per survegnir ulteriurs uffants datti però anc adina restricziuns.

Dapli mattets che mattettas

Entras la politica d’in uffant è l’equiliber tranter la schlattainas sa spustà: l’onn 2014 èn naschids stgars 116 mattets per mintga 100 mattettas, perquai che la populaziun rurala aveva survegnì il dretg sin in segund uffant, sche l’emprim era ina mattetta. Actualmain vivan passa 1,37 milliardas persunas en la China. Tenor adherents da la politica d’in uffant fissan quai uschiglio gia 400 milliuns dapli.

Midada duai mitigiar vegliandrament

La politica d’in uffant n’è mai stada valaivla per l’entira populaziun. Excepziuns eran las 55 minoritads etnicas. Avant dus onns era la politica d’in uffant vegnida schluccada. Dapi lura dastgavan pèrs aviar dus uffants, sch’in dals geniturs era in uffant sulet.

La schluccada toc a toc da la controlla da naschientschas duai cumbatter il vegliandrament successiv e la mancanza da forzas da lavur. Critichers èn dentant da l’avis che la midada arriva memia tard e n’è betg avunda vasta.

RR novitads 14:00