A Hongkong è annunzià per glindesdi ina chauma generala. La scheffa da la regenza, Carrie Lam, ha avertì che Hongkong saja en ina situaziun extrem privlusa. Las protestas sajan ina sfida per la suveranitad da la China e donnegian l'economia en la metropola chinaisa.
Stritgà dapli che 200 sgols
Demonstrants han disturbà il traffic public en la metropola da milliuns. Tranter auter han els bloccà portas da las viafiers sutterranas. Il manaschi è vegnì interrut sin pliras lingias. A l'eroport èn gia dapli che 200 sgols vegnids stritgadas.
Demonstraziuns durant la fin d'emna
Dumengia avevi danovamain dà confruntaziuns violentas tranter demonstrants e la polizia. Dumengia èn millis da persunas idas sin via. Gia sonda han dieschmillis persunas demonstrà cunter l’influenza da la regenza centrala a Peking. La polizia haja duvrà gas lacrimogen ed arrestà passa 40 persunas.
RR novitads 06:00