Siglir tar il cuntegn

Header

cancelled.
Legenda: Lufthansa ha stritgà la gievgia 700 sgols. 1'100 fissan stads planisads. Keystone
cuntegn

Chauma da Lufthansa 1'300 sgols stritgads

Il persunal da cabina da la Lufthansa ha cumenzà da mesanotg cun ina chauma da dus dis. Clamà a la chauma ha il sindicat UFO. Tenor la societad aviatica tudestga vegnian perquai oz e damaun 1'300 sgols stritgads. Pertutgads sajan radund 180'000 passagiers.

Cunzunt blers aviuns als eroports centrals Minca e Frankfurt restan per terra. Ina gronda part dals sgols da la Lufthansa che van sur mar crodan.

Chauma da Lufthansa pertutga strusch Swiss

Pervi da la chauma sgolia Swiss, la societad affiliada da la Lufthansa, durant ils dis da chauma per part cun aviuns pli gronds tranter la Svizra e Frankfurt respectivamain Minca. Uschiglio na saja Swiss betg pertutgada da la chauma, sco in pledader ha ditg sin dumonda da l’agentura da novitads AWP. Plinavant na sajan er naginas annullaziuns uffizialas da sgols da la Lufthansa vegnidas annunziadas per l’eroport da Turitg.

Dapli spesas e supplements per flight attendants

Davant dretgira aveva Lufthansa empruvà adumbatten da laschar scumandar la chauma. La Dretgira da lavur ha però decis che la chauma saja legitima. La pretensiun d'auzar las pajas per 1,8% aveva Lufthansa ademplì voluntariamain cun auzar las pajas per 2%. Il sindicat pretenda dapli spesas ed indemnisaziuns per ils radund 21'000 flight attendants sco er contracts da lavur regulars per persunas che sajan engaschadas a temp limità.

RR novitads 06:00