Siglir tar il cuntegn
Inhalt

Exteriur Chasa paterna da Hitler prest en possess dal stadi?

La regenza austriaca na vul betg pli ditg laschar en possess privat la chasa paterna d’Adolf Hitler. Cun in’expropriaziun vul il ministeri da l’intern fa la segira che la chasa na vegn betg duvrada en in senn naziunalsocialistic.

L'Austria na vul betg che la chasa paterna da Hitler daventa in lieu da pelegrinadi.
Legenda: L'Austria na vul betg che la chasa paterna da Hitler daventa in lieu da pelegrinadi. SRF

L’Austria vul expropriar la possessura da la chasa paterna d’Adolf Hitler. Suenter blers onns da contractivas senza success areguard il diever dal bajetg nunutilisà a Braunau am Inn en l’Austria Auta ha il ministeri da l’intern uss decis quest pass. Il proceder exact duai uss vegnir examinà.

Adolf Hitler.
Legenda: Adolf Hitler era tranter 1933 e 1945 dictatur crudaivel da la Germania naziunalsocialistica. Keystone

«Expropriaziun sco suletta via»

Il ministeri sto anc far ina midada da la lescha. In rapport correspundent da la gasetta «Oberösterreichischen Nachrichten» haja conferma in pledader dal ministeri, scriva SRF. Ils discurs d’enfin qua cun la possessura sajan stads senza resultat. Il pledader ha ditg ch’i dettia be ina via per sclauder il niz dal bajetg per activitads naziunalsocialisticas – e quai saja l’expropriaziun.

La dunna duai survegnir in’indemnisaziun. Fin uss haja ella adina refusà offertas da cumpra per la chasa al cunfin tudestg-austriac. Dapi il 1972 è il ministeri il locatari principal. Fin il 2011 sa chattava en la chasa in lavuratori per umans cun impediments. La possessura aveva lura dentant refusà da laschar modernisar il bajetg tenor ils basegns da las persunas cun impediments. Dapi lura è la chasa nunutilisada.

RR novitads 08:30