Cunzunt duas chaussas fan quitads a Barbara Dietrich da l'organisaziun d'agid Helvetas, ch'è activa en ils champs da fugitivs dals Rohingya en il Bangladesch. Per l'ina saja il sistem da scola crudà ensemen, per l'autra funcziuneschia il provediment da nutriment mal.
Scola suenter trais onns
En sasez avessan ils millis d'uffants en ils champs da fugitivs gì da cumenzar la scola tenor il plan d'instrucziun da Myanmar quest onn. Entras la pandemia da corona na saja quai dentant betg stà pussaivel, di Barbara Dietrich che coordinescha las acziuns d'agid da Helvetas en il Bangladesch, envers RSI. Uschia stoppian ils voluntaris al lieu dar scola ad hoc als uffants ch'els emprendian almain il minimum.
Sistem da nutriment na funcziuna betg
Er il sistem da nutriment saja crudà ensemen. Uschia hajan ils fugitivs construì in sistem durant ils ultims trais onns ch'els vivan els champs. Cun las mesiras da corona saja quel dentant crudà ensemen, uschia n'hajan ils fugitivs betg daners per cumprar legums. Els survegnian sulettamain las victualias da basa sco ris e fava che vegnan furnidas. Quai mainia ad ina alimentaziun manglusa.