Siglir tar il cuntegn

Exteriur Catalugna vul separaziun immediata tar gea a votaziun

En la Catalugna datti l'october che vegn ina nova votaziun davart la separaziun da la Spagna, quai ha la regenza regiunala communitgà. Tar in gea, vul la regenza regiunala catalana declerar immediat l'independenza.

Purtret da demonstrants che tignan si il pled «independencia».
Legenda: Gia dapi onns vul la Catalugna votar davart si'independenza. La regenza a Madrid fa tut per evitar quai. Keystone

Sch'i dettia in gea tar la votaziun per l'independenza da la Spagna, sche stoppia la separaziun vegnir realisada immediat, quai ha declerà ina delegada dal parlament regiunal da la Catalugna. Sch'i dettia in na tar quella votaziun, lura stoppia dar elecziuns novas en la regiun. Ina gruppaziun ha preschentà ina lescha che pussibilitescha ina votaziun populara era sche la regenza centrala a Madrid na vul betg la votaziun. La lescha stgaffescha in rom giuridic che dat in status extraordinari a la Catalugna. Uschia pudess la regiun sviar la lescha federala.

Quai è in putsch en in vestgi democratic.
Autur: Xavier Garcia-AlbiolDeputà da la Catalugna

Gia il 2014 ha la dretgira constituziunala spagnola declerà sco illegala ina votaziun davart l'independenza da la Catalugna. Era la regenza spagnola vul impedir ina tala votaziun da la Catalugna. Ils derschaders han argumentà ch'i giaja qua per ina dumonda d'unitad dal pajais ed i na saja perquai betg pussibel che be la Catalugna possia decider en chaussa. La regenza regiunala n'haja betg questa cumpetenza.

L'independenza sparta era la Catalugna

La dumonda da l’independenza separa la populaziun en la Catalugna. Las retschertgas mussan ch’ina mesadad vul restar tar la Spagna e l’autra part vul l’independenza. Passa 70% beneventassan dentant ina tala votaziun per sclerir definitivamain la dumonda.

RR novitads 17:00